Ysbrydoli yw teitl y rhifyn hwn ac mae’n cynnwys darnau amrywiol am bobl sydd wedi cael eu hysbrydoli ac am bobl a phethau sy’n ysbrydoli pobl eraill.
Mae beth neu phwy sy’n eich ysbrydoli yn unigryw i bob un. Dychmygwch pa mor ddiflas byddai bywyd os mai un peth fyddai’n ysbrydoli pawb drwy’r byd! Dyna beth sy’n wych am gael eich ysbrydoli gan amrywiaeth o bethau – mae’n cynnig ychydig o gyffro a dyhead ym mhob un ohonom ni!
Ydych chi erioed wedi bod mewn gwersi yn yr ysgol ac wedi cael eich cyffroi gymaint ei fod wedi eich ysbrydoli i wneud fwy o waith ymchwil?
Gall amrywiaeth o bobl ein hysbrydoli, er enghraifft:
Tybed ydych chi wedi ystyried beth wnaeth ysbrydoli Alun Wyn Jones i chwarae rygbi? Un peth sy’n sicr, mae e wedi ysbrydoli nifer o fechgyn a merched i ddilyn eu breuddwydion o chwarae rygbi.
Gall digwyddiadau hefyd ein hysbrydoli i ddilyn gyrfa neu hobi newydd, er enghraifft:
Mae astudiaethau’n dangos fod gwylio’r Gemau Olympaidd yn gallu ysbrydoli plant i gymryd diddordeb mewn amrywiaeth o chwaraeon newydd. Ydych chi’n mwynhau gwylio’r Gemau? Pa chwaraeon ydych chi’n hoffi ei wylio fwyaf?
Meddyliwch yn ofalus, pwy sy’n eich ysbrydoli chi? Oes rhywbeth allwch chi ei wneud er mwyn ysbrydoli eraill?
Diwrnod Hapusrwydd Rhyngwladol
Pryd: Dydd Llun, Mawrth 20fed
Beth: Ysbrydoli pobl eraill; gwneud pobl eraill (a chi’ch hun) yn hapus
YSBRYDOLWCH RYWUN.
YSBRYDOLWCH EICH HUN.
Rwy’n ferch ffarm sy’n wreiddiol o Lanafan ger Llanfair-ym-Muallt. Cefais fy magu ar aelwyd ddi-gymraeg. Cefais fy addysg yn Ysgol Dyffryn Irfon ac Ysgol Uwchradd Llanfair-ym-Muallt cyn mynd ymlaen i astudio Cymraeg a Mathemateg ym Mhrifysgol Aberystwyth.
Un o fy atgofion cyntaf o ddefnyddio’r iaith oedd siarad gyda fy nhadcu. Roedd y ddau ohonom ni wrth ein boddau yn sgwrsio yn Gymraeg. Fe wnaeth fy ysbrydoli i ddysgu Cymraeg yn iawn. Roeddwn i’n ffodus iawn hefyd o fy ffrindiau a oedd yn helpu fi i ymarfer y Gymraeg. Pan oeddwn ym Mhrifysgol Aberystwyth arhosais yn Neuadd Pantycelyn ac roedd cael bod yn rhan o’r diwylliant Cymraeg yno bendant wedi fy helpu i fagu hyder yn siarad yr iaith.
Yn 2016 fe gystadlais yng nghystadleuaeth Dysgwr y Flwyddyn yn Eisteddfod Genedlaethol Sir Fynwy a’r Cyffiniau. Roedd y broses yn un anodd ond cyffrous iawn. Roeddwn wedi gweithio’n galed er mwyn paratoi ac fe gyrhaeddais i’r rownd derfynol! Er na enillais i’r gystadleuaeth y diwrnod hwnnw, rwy’n teimlo’n ffodus iawn fy mod wedi cael y profiad a fy mod nawr yn fwy hyderus yn siarad yn Gymraeg.
Enw: Anwen Jenkins
Beth yw dy swydd di?
O ran y busnes, fi yw’r sefydlwraig, o ran gwaith tu allan i’r busnes, dwi’n athrawes lawn amser. Dwi’n dysgu plant blwyddyn 3, 4, 5 a 6 yn yr un dosbarth. Mae yna ryw ugain o blant yn y dosbarth, a rhyw ddeugain yn yr ysgol i gyd. Felly, dim ond dau ddosbarth sydd yn yr ysgol i gyd, ysgol fach y wlad yw hi.
Pam mai athrawes oeddet ti am fod?
Dyma beth oeddwn eisiau bod ers oeddwn yn ferch fach. Roeddwn yn arfer rhoi ‘gwaith’ allan i’r tedis a’r doliau yn fy ystafell wely! Rwyf wrth fy modd yn bod yn greadigol yn y dosbarth a fy hoff wersi ydy’r rhai Celf, wrth gwrs!
Pryd nes di ddechrau’r busnes Ani-bendod?
Mi ddechreues i ani-bendod ryw dair blynedd yn ôl bellach.
Beth wnaeth dy ysbrydoli i ddechrau?
Cefais fy ngeni a’m magu ar fferm ddefaid a gwartheg yng ngogledd sir Ceredigion. Roedd y defaid a’r tirwedd o’m cwmpas yn ysbrydoliaeth fawr i fy ngwaith. Ers yn ferch fach, roeddwn yn joio chwarae o gwmpas efo celf ac yn gwario fy holl arian poced ar adnoddau. Mi weles i rywun yn ‘ffeltio’ unwaith ac mi wnaeth fy ysbrydoli i fynd ati i ymchwilio ymhellach a dysgu fy hun sut i wneud.
Pa gynnyrch nes di ddechrau gwneud ar y dechrau?
Felly ffeltio tirweddau a defaid oeddwn yn gwneud yn y dechrau. Roeddwn yn tynnu lluniau o’r ffelt ac yn creu cardiau pen-blwydd, priodas, ag ati.
Beth yw dy gynnyrch mwyaf poblogaidd?
Erbyn hyn, rwyf wedi ymestyn mewn i frodweithio. Mi wnes i lawnsio fy nghasgliad cyntaf o ddillad yn Haf 2020. Erbyn hyn, siwmper gyda’r dywediad ‘hapus fy myd’ arni yw’r cynnyrch mwyaf poblogaidd o bell ffordd.
O ble rwyt ti’n cael dy ysbrydoliaeth?
O’r byd o’m cwmpas, dwi’n hoff iawn o liw ac yn ceisio gwneud rhywbeth sy’n hollol unigryw bob tro, rhywbeth nad yw wedi cael ei wneud o’r blaen. Hapusrwydd yw prif fwriad a’r teimlad dwi eisiau i bobl deimlo wrth edrych ar fy ngwaith.
Camp Newydd
Mae Ellis Grover o Gaerfyrddin wedi ei ysbrydoli!
Mae e wedi ei ysbrydoli gan gamp newydd – camp sydd wedi cael ei gwneud yn un o chwaraeon swyddogol Prydain ers Ionawr 2017.
Beth yw’r gamp?
Parkour yw enw’r gamp hon – ac mae’n gamp beryglus!
Mae Ellis yn dod o Gaerfyrddin yn wreiddiol, ond mae e wedi teithio i lawer o wledydd diddorol fel perfformiwr syrcas gyda chwmni syrcas Pirates of the Carabina. Mae e wedi bod yn cerdded ar wifrau uchel a pherfformio styntiau rhyfeddol ar draws y byd.
Mae e wrth ei fodd gyda parkour. Dechreuodd e pan oedd e tua 12 oed, pan oedd e a’i ffrindiau’n ymarfer o gwmpas yr ardal. Mae e’n dweud bod parkour wedi newid ei fywyd ond mae’n pwysleisio nad neidio a rhedeg yn unig yw’r gamp. Mae parkour yn bwysig o ran gwneud pobl yn hapus, meddai.
Sut mae Parkour yn gwneud pobl yn hapus?
Efallai bod pobl yn nerfus i ddechrau – yn ofnus hyd yn oed – ond maen nhw’n canolbwyntio ar neidio’n ddiogel ac yna, ar ôl llwyddo, maen nhw’n teimlo’n fodlon â’u hunain. Mae pobl yn concro’u hofnau ac yn teimlo’n hapus.
Mae’r gamp yn dod yn llawer mwy poblogaidd, gyda phobl ifanc ar draws Cymru’n cael eu hysbrydoli i’w gwneud hi.
Gofalus!
Mae’r gamp yma’n beryglus, wrth gwrs. Rhaid meddwl, ystyried ac ymarfer. Peidiwch â’i gwneud hi mewn mannau peryglus a gwnewch yn siŵr eich bod chi’n ymarfer y symudiadau’n iawn. Cofiwch wisgo’n briodol hefyd.
Stadiwm Dinas Caerdydd
Heol Lecwydd
Caerdydd
CF11 8AZ
10/04/2021
Annwyl Ein Byd,
Roedd gwylio gemau’r Ewros yn 2016 yn bleser! Ces i – a miloedd o bobl eraill – fy ysbrydoli gan y cefnogwyr a’r tîm. Oherwydd eich hymgais arwrol rydw i wedi dechrau chwarae pêl-droed a rwy’n gobeithio chwarae dros Gymru un dydd!
Roedd y papurau a’r newyddion ar y teledu yn dangos miloedd o gefnogwyr Cymru yn eu gwisgoedd coch yn canu, yn gweiddi’n hapus, yn mwynhau’r gemau ond yn ymddwyn yn wych yr un pryd. Roedden nhw’n esiampl i bawb.
A’r tîm – beth alla i ddweud? Roedden nhw’n anhygoel! Dw i mor falch eu bod nhw wedi cadw at eu harwyddair “Gyda’n gilydd yn gryfach”. Roedd hi’n amlwg bod aelodau’r tîm yn deall ei gilydd a’u bod yn gweithio gyda’i gilydd. Yn ogystal, roedden nhw’n dangos parch tuag at eu cefnogwyr, yn enwedig pan wisgon nhw grysau gyda’r geiriau DIOLCH arnyn nhw.
Ysbrydolodd y tîm Gymru gyfan. Roedd pobl sydd ddim fel arfer yn mwynhau pêl-droed wrth eu bodd yn gwylio’r gemau ac roedd Cymry o Fôn i Fynwy yn teimlo mor falch. Dyna pam daeth miloedd o bobl allan i groesawu’r tîm ar ôl iddyn nhw ddychwelyd o Ffrainc. Dyna pam daeth miloedd i gyngerdd mawr gyda’r Manic Street Preachers yng Nghaerdydd. Roedden nhw eisiau dweud, “Diolch yn fawr!”.
Rwyf am orffen gan ddweud POB LWC anferthol i chi a’r bechgyn yn eich hymgais yn yr Ewros y tro nesaf yn 2021!!
Diolch!
Alex