Y Chwyldro Pobi!

Beth yw pobi?

Pobi yw’r dull o goginio gan ddefnyddio aer sych. Er bod pobl gan amlaf yn pobi mewn popty mae hefyd yn bosib pobi mewn lludw neu gerrig poeth.

Beth allwn bobi?

Mae pobl yn pobi amrywiaeth o fwydydd. Yr un mwyaf poblogaidd mae’n siŵr yw bara, ond mae’r dull yma o goginio hefyd yn cael ei ddefnyddio ar gyfer cacennau, crystiau, pastai, cwcis, sgonau, dim ond i enwi rhai. Mae modd pobi rhain yn y cartref neu eu prynu o fecws.

Sut i bobi?

Mae cynnyrch wedi’u pobi fel arfer yn cynnwys blawd, dwr a deunydd codi. Cynhwysion cyffredin arall ydy wyau, olew, llaeth a chynhwysion melys fel siwgr. Mae modd cymysgu’r holl gynhwysion i greu toes yn gyntaf a dylai’r toes yma wedyn sefyll er mwyn sicrhau fod y deunydd codi yn cael amser i ddatblygu. Byddwch yn gwybod pan fydd hyn yn gweithio pan welwch y toes yn codi! Yn aml wedyn bydd angen siapio’r toes, gan ddefnyddio eich dwylo neu dorwyr arbennig, ac yna ei roi yn y ffwrn.

Tystiolaeth hanesyddol o bobi

Yn ôl bob sôn dechreuodd bobl bobi drwy socian glaswellt gwyllt mewn dŵr ac yna ei stwnsio i mewn i bast. Gan nad oedd unrhywbeth tebyg i ffwrn neu bopty ar gael ar y pryd roedd y past yma wedyn yn cael ei roi ar garreg boeth fflat i goginio – roedd y cynnyrch ar y diwedd yn gynnyrch tebyg i fara.

Ni chafodd y ffwrn ei ddyfeisio tan ganrifoedd yn ddiweddarach. Cafodd y ffwrn hynaf ei ddarganfod yng Nghroatia yn 2014. Cred yr arbenigwyr fod y ffwrn yma yn dyddio yn ôl 6,500 o flynyddoedd!

The Great British Bake Off

Mae’r rhaglen deledu yma wedi dod yn boblogaidd iawn ym Mhrydain ac edrychodd 10.87 miliwn o bobl ar y gyfres ddiweddaraf yn 2020. Mae’r rhaglen wedi ysbrydoli llawer o bobl i ddechrau pobi.

Ewch i ateb cwestiynau yn y gêm ryngweithiol i weld faint ydych chi’n ei wybod am The Great British Bake Off!

Geirfa

Becws:

Siop arbennig sy’n gwerthu nwyddau wedi’u pobi.

Cynhwysion:

Y bwydydd gwahanol sydd eu hangen er mwyn coginio rysáit.

Deunydd codi: Cynhwysion

Cynhwysion sy’n achosi’r toes i godi drwy gynhyrchu swigod aer. Enghreifftiau o ddeunydd codi yw burum, powdr codi a soda pobi.

Blog

Cau

Lucia Bianchi

14/06/2021

Bwyty Giovanni

Mae’r bwyty Eidalaidd Giovanni’s wedi bod ar Heol y Parc ers rhyw chwe mis. Dydy’r bwyty ddim yn fawr iawn; mae’n adeilad eithaf cul ac efallai fod lle i 20 o bobl. Mae’r gegin yn y cefn ac mae’n bosib gweld y cogyddion yn paratoi’r bwyd. Mae lliain bwrdd coch tywyll dros bob bwrdd a channwyll fach ar bob un. Maen nhw’n chwarae cerddoriaeth Eidalaidd yn y cefndir, felly mae’r awyrgylch yn hamddenol braf.

Cefais fy synnu o weld bod y lle bron yn llawn ar nos Lun. Roedd hynny’n arwydd da. Roedd dau weinydd yno i’n croesawu.

I ddechrau, ces i gawl y dydd, cennin a chaws Stilton. Roedd y bara cartref yn ffres ac yn flasus dros ben.
Roedd y prif gwrs, sef Linguine Marinara – pasta bwyd môr mewn saws tomato cyfoethog yn arbennig o dda. Roedd y cyflwyniad yn syml ond roedd blas y saws yn nefolaidd.

Roedd pawb yn canmol yn fawr gan fod hen ddigon o fwyd, a hwnnw’n fwyd blasus. Roedd boliau pawb yn dynn erbyn diwedd yr ail gwrs.

OND... roedd lle i bwdin, wrth gwrs! Gan ein bod mewn bwyty Eidalaidd, roedd rhaid dewis tiramisu. Roedd hwnnw’n baradwys mewn powlen! Ardderchog yn wir.

Pryd gwych a rhesymol – £16.99 am dri chwrs swmpus, neu allech chi ddewis dau gwrs am £13.99.

Maen nhw’n cynnig bwyd Eidalaidd da, ac rwy’n sicr fod pawb sy’n bwyta yno’n argymell y lle i’w ffrindiau a’u teuluoedd.

Testun & llun

Linc

Cerdyn trump

Cau

Elliw Gwawr

Enw:

Elliw Gwawr

Gwaith:

Mae Elliw Gwawr yn ohebydd gwleidyddol gyda’r BBC yn San Steffan, Llundain.

Dechrau diddordeb mewn coginio:

Pan oedd hi’n ferch fach, dechreuodd Elliw goginio gyda’i Nain ac mae hi’n defnyddio llawer o’i hen ryseitiau hi.

Mae Elliw yn ysgrifennu blog pobi:

www.panedachacen.wordpress.com. Mae’n lliwgar ac yn ddiddorol iawn.

Llyfrau coginio:

Mae Elliw wedi cyhoeddi dau lyfr pobi Cymraeg: Paned a Chacen a Pobi, doedd dim llyfr Cymraeg am bobi’n unig.

Rhyngweithiol

Fideo

Cau

Y bara brith gorau yn y byd!

On i’n edrych ymlaen bob blwyddyn yn Llandudno am y Ffair Nadolig. Mae o’n dod â phobl i mewn i’r dre sy’n ganolbwynt siopa yn y gogledd ‘ma, a’r Ffair Nadolig ydi cychwyn y Nadolig yn Llandudno. Uchafbwynt y ffair Nadolig eleni ydi pencampwriaeth y byd; Bara Brith.

Wel, rydan ni wedi cael bore gwych yn Llandudno yma yn beirniadu Bara Brith. Mae’r cystadleuwyr wedi dod o bob man, o bob cornel o Gymru.

Ac mae’n wir i ddweud bod un wedi dod mor bell ag Awstralia fel rydyn ni’n deall, sy’n anhygoel bod y bara brith wedi teithio mor bell. Mae’r blasau yn fendigedig, rydyn ni wedi blasu bob un o’r 70 ac yn falch iawn o gyhoeddi mai Delyth Jenkins o Ffosyffin yng Ngheredigion sydd wedi mynd â hi.

Rydw i’n llysgennad i Ŵyl Fwyd Llandudno dros y pedwar diwrnod ac mae’n bwysig i mi fel ffarmwr ac fel rhywun lleol bo ni’n hybu hyn. Fel diwydiant ‘da ni’n wych yn ei gynhyrchu o ond ddim yn wych am ei werthu o. A ma' llefydd fel’ma’n fendigedig i ni gael y stori allan a ‘da ni eisiau gweld mwy o gŵyl bwyd a busnesau bach ‘ma o gwmpas Cymru.

Fel noddwr y bencampwriaeth Bara Brith roedden ni’n ofnadwy o falch o’r ymateb ‘da ni ‘di gael. A be on i’n ofnadwy o falch hefyd oedd gweld yr ymdrech oedd y pobyddion wedi mynd i i ddefnyddio cynhwysion Cymraeg, cynhwysion lleol iddyn nhw fel wyau ac ambell un gyda twtsh o wisgi Cymreig hefyd. Rydyn ni’n falch iawn fel noddwyr gall cyflwyno’r tlws bendigedig yma i’r enillydd sef Delyth Jenkins o Ffosyffin, Aberaeron.

Fideo