Mae llawer o resymau dros gynnwys Cymru fel cyrchfan i bobl ymweld â hi. Mae ei diwylliant a’i threftadaeth gyfoethog, ei pharciau cenedlaethol, ei gerddi, ei hantur, ei theithiau cerdded, ei bwyd a’i diod yn ei gwneud yn gyrchfan ddymunol iawn i ymwelwyr o bob rhan o'r byd. Gwlad Geltaidd yw Cymru ac mae hi tua 180 milltir o hyd a 60 milltir o led ac wrth ichi deithio o amgylch Cymru mae'r golygfeydd yn newid yn gyson o fynyddoedd i arfordiroedd hardd.
Gan fod rhyw 20% o'r boblogaeth yn siarad Cymraeg fel eu hiaith gyntaf, mae ymdeimlad cryf o hunaniaeth yn y wlad ddwyieithog.
Mae llawer i'w weld a'i brofi yng Nghymru o dros 600 o gestyll (mae gan bedwar ohonyn nhw Statws Treftadaeth Byd UNESCO), tri pharc cenedlaethol, traethau sydd wedi ennil gwobrau yn ogystal â nifer o drefi marchnad a dinasoedd. Gallwch brofi a mwynhau cefn gwlad ac arfordir helaeth ar hyd nifer o lwybrau cerdded neu feicio. Yng Nghymru mae bron 33,000km o lwybrau cerdded gan gynnwys tri llwybr cenedlaethol a Ffordd yr Arfordir.
Mae'r tri pharc cenedlaethol, Parc Cenedlaethol Arfordir Penfro, Parc Cenedlaethol Eryri a Pharc Cenedlaethol Bannau Brycheiniog yn cwmpasu 20% o arwynebedd tir Cymru ac mae gan Gymru bump o Ardaloedd o Harddwch Naturiol Eithriadol hefyd. Mae’r mynydd uchaf, Yr Wyddfa, ym Mharc Cenedlaethol Eryri ac mae’n 1,085 metr o uchder.
Yn y brifddinas, Caerdydd, mae digon i'w weld a'i wneud o ymweld â'r castell, i'r Amgueddfa Genedlaethol, Amgueddfa Werin Sain Ffagan a Stadiwm Principality, sef cartref rygbi Cymru.
Mae'r tywydd yng Nghymru yn fwyn ac amrywiol. Y tymheredd cyfartalog ym misoedd yr haf yw rhyw 2°C a rhyw 6°C ym misoedd y gaeaf.
Dros y blynyddoedd mae Cymru wedi cynnal digwyddiadau byd-eang mawr gan gynnwys Cwpan Ryder yn y Celtic Manor yn 2010, Uwchgynhadledd NATO yn 2014, Cynghrair Pencampwyr UEFA yn 2017 a Chwpan Criced y Byd yr ICC yng Ngerddi Sophia, Caerdydd 2019.
Mae Cymru'n croesawu tua 10,000,000 o ymwelwyr y flwyddyn, gan gynnwys tua 1,000,000 o ymwelwyr rhyngwladol. Am le anhygoel i fyw! Beth sy'n gwneud Cymru'n arbennig i chi?
Bwthyn Gwyliau Clogwyn Caerwenfor
Mae Caerwenfor yn eiddo anarferol, wedi’i godi tua 300 metr uwchben y môr rhwng Llangrannog a Chwmtydu gyda golygfeydd gwych dros Arfordir Aberteifi. Mae'r eiddo'n cynnwys tua 52 erw ac mae wedi'i leoli ar ei ben ei hun ar yr arfordir. Does dim eiddo arall yn edrych dros Caerwenfor, sy’n wirioneddol unigryw.
Mae'r tŷ hwn yn wirioneddol anhygoel ac mae'n cynnig cyfle prin i fwynhau lleoliad heb ei ail o fewn ei 52 erw ei hun o dir SoDdGA (Safle o Ddiddordeb Gwyddonol Arbennig) gyda fflora a ffawna helaeth.
O'r ffenestri mawr gallwch edrych i lawr ar y bae i wylio dolffiniaid, morloi, adar môr yn ogystal â barcutiaid coch a hebogiaid tramor neu gychod cimychiaid a llongau pleser. Ar ddiwrnod clir gallwch weld ynys Enlli ar benrhyn Llŷn.
Mae traeth Cwmtydu 1.5 milltir i ffwrdd ar y ffordd, ond mae’n fyrrach os byddwch yn cerdded llwybr yr arfordir, a gallwch ymuno â hwnnw o'r bwthyn. Efallai na fyddwch chi am adael y bwthyn o gwbl ond os gwnewch chi, mae trefi Aberporth, Llangrannog, Cei Newydd, Aberaeron ac Aberteifi i gyd yn agos.
Rydym yn cymryd archebion fesul wythnos o ddydd Sadwrn i ddydd Sadwrn rhwng mis Ebrill a mis Hydref. Rydyn ni’n cynnig seibiau byr rhwng mis Tachwedd a mis Mawrth
Ysgol Gyfun y Llan
Llan-aber
Ceredigion
SA89 6TT
15/06/2020
Ysgrifennaf ar ran pwyllgor Gŵyl Gwylanod yr ysgol i ddiolch i chi am eich cefnogaeth i’r ŵyl, 23-24 Mai. Diolch i’ch cefnogaeth chi a busnesau a mudiadau lleol eraill, a, diolch i roddion gan bobl oedd yn methu dod i’r penwythnos, llwyddom i godi dros £20 000 i’r hosbis leol.
Credaf fod pawb wedi mwynhau’r ŵyl yn fawr. Roedd y sesiwn bandiau yn y Neuadd nos Wener yn gyffrous tu hwnt ac roedd hyn yn gyfle gwych i roi llwyfan i leisiau newydd yr ardal. Roedd hi’n amlwg fod digon o hwyl i’w gael ar y dydd Sadwrn hefyd, gyda’r plant yn gwneud gweithgareddau amrywiol ar y traeth yn yr heulwen braf a’r bobl ifanc a’r oedolion yn mwynhau gwahanol gystadlaethau morol, heb sôn am y stondinau crefftau a bwyd y môr a oedd ar hyd yr harbwr.
Bydd darn am yr ŵyl ar S4C yn y dyfodol agos. Byddaf yn rhoi gwybod i chi pryd yn union pan gaf y wybodaeth oddi wrth y cwmni fydd yn darlledu.
Mae fy nghyd-ddisgyblion a minnau wedi mwynhau trefnu’r ŵyl yn fawr ac rydym wedi cael llawer o brofiadau gwerthfawr wrth wneud hyn. Roedd cael cefnogaeth busnesau lleol fel chi yn gymorth mawr. Felly, diolch unwaith eto.
Yn gywir,
Lee Evans
Ffeithiau a gwybodaeth am Gymru
Enw: Cymru
Lleoliad: Mae Cymru ar ynys Prydain Fawr, i'r gorllewin o Loegr.
Maint: Mae Cymru oddeutu 20,800 km sgwâr o ran arwynebedd.
Poblogaeth: 3.1 miliwn
Cylchfa Amser: Amser Safonol Greenwich
Arian: Y Bunt Sterling
Anthem Cenedlaethol: Hen Wlad fy Nhadau
Iaith: Cymraeg a Saesneg – gwlad ddwyieithog yw Cymru
Llywodraeth: Llywodraeth ddatganoledig gyda senedd etholedig yn adeilad y Senedd, Caerdydd
Prifddinas: Caerdydd
Dinasoedd: Caerdydd, Casnewydd, Abertawe, Bangor, Tyddewi, Llanelwy