Cynhelir Eisteddfod Genedlaethol Cymru yn flynyddol bob yn ail o’r de i’r gogledd, mewn gwahanol leoliadau ar draws Cymru. Bydd yr Eisteddfod yn denu tua 150,000 o ymwelwyr o Gymru ac yn rhyngwladol i’r maes sy’n cynnwys dros 250 o stondinau ac atyniadau amrywiol. Bydd oddeutu 6000 o bobl yn cystadlu ac yn perfformio dros gyfnod o wythnos yn yr Eisteddfod. Credir mai Eisteddfod Genedlaethol Cymru yw’r Ŵyl ddiwylliannol fwyaf yn Ewrop. Mae’r Eisteddfod yn cynnig llwyfan ar lefel genedlaethol a rhyngwladol ar gyfer cerddoriaeth, dawns, celfyddydau gweledol, llenyddiaeth, perfformiadau a llawer mwy.
Cynhaliwyd yr Eisteddfod gyntaf yn 1176 o dan nawdd yr Arglwydd Rhys yn ei gastell yn Aberteifi. Gwahoddwyd beirdd a cherddorion o bob rhan o'r wlad i'w gastell, gan anrhydeddu'r bardd a'r cerddor gorau â chadair traddodiadol sydd wedi parhau hyd heddiw. Cynhaliwyd yr Eisteddfod Genedlaethol gyntaf yn Aberdâr yn 1861.
Efallai eich bod wedi gweld lluniau o’r Eisteddfod ar y teledu ac wedi sylwi ar rai pobl wedi gwisgo mewn lliain gwyn, gwyrdd a glas yn cael eu harwain gan unigolyn arbennig. Os felly rydych wedi gweld Gorsedd y Beirdd a’r Archdderwydd.
Cymdeithas o feirdd, awduron, cerddorion, artistiaid ac eraill sydd wedi gwneud cyfraniad i Gymru, yr iaith Gymraeg a'i diwylliant yw Gorsedd y Beirdd. Mae enwogion fel y cyflwynydd radio Huw Stephens, y gantores Caryl Parry Jones, y canwr opera Bryn Terfel, yr athletwraig Tanni Grey-Thompson a’r cogydd Bryn Williams wedi eu hurddo i’r orsedd.
Yr Archdderwydd yw Pennaeth yr Orsedd. Caiff ei ethol am gyfnod o dair blynedd ac mae'n gyfrifol am arwain seremonïau'r Orsedd yn ystod wythnos yr Eisteddfod. Seremonïau’r Orsedd yw’r Coroni, y Fedal Ryddiaith a'r Cadeirio.
Tybed os ydych wedi gweld cylch o feini mewn pentrefi a threfi ar hyd a lled Cymru? Os felly rydych wedi gweld Cylch yr Orsedd. Maent wedi eu gadael yno i nodi bod yr Eisteddfod Genedlaethol wedi ymweld â'r dref neu'r ardal honno.
Bydd yr Eisteddfod nesaf yn cael ei chynnal yn Nhregaron o’r 31ain o Orffennaf i’r 7fed o Awst 2021. Gobeithio y byddwch yn ymweld ac efallai cystadlu!
Helo, bawb.
Dw i yng Ngwersyll yr Urdd, Caerdydd.
Daliais i’r bws o’r ysgol am naw o’r gloch y bore yma. Teithion ni i lawr o Ruthun, drwy Amwythig, drwy Henffordd ac yna aethon ni i’r Pwll Mawr ar y ffordd. Fe gyrhaeddodd y bws am 12:45. Cawsom frechdanau ar y bws cyn mentro i grombil y ddaear. Roedd o’n anhygoel! Aethon ni i lawr ... i lawr ... i lawr ... o dan y ddaear i weld ble roedd y glowyr yn gweithio. Anhygoel! Edrychwch ar y cyswllt i ymchwilio ymhellach:
http://www.amgueddfacymru.ac.uk/bigpit/
Mae gwersyll yr Urdd yn wych. Mae e yng Nghaerdydd – yn y ddinas, wrth y bae – tu ôl i Ganolfan y Mileniwm.
Heno, rydyn ni’n mynd i sglefrio iâ yn y ddinas ac yfory rydyn ni’n mynd i weld Stadiwm y Principality ac rydyn ni’n mynd o gwmpas y Bae. Dw i’n edrych ymlaen. Mae llawer i’w weld a’i wneud yn y brif ddinas.
Amser te – rhaid i mi fynd!
Darllenwch y blog yfory os ydych chi eisiau gwybod mwy!
Dyma gysylltiadau os ydych chi eisiau gweld ble dw i’n aros:
http://www.urdd.cymru/cy/ein-gwersylloedd/caerdydd/cyfleusterau/.
http://www.urdd.cymru/cy/ein-gwersylloedd/caerdydd/pethau-iw-wneud/atyniadau/
Dw i yng Ngwersyll yr Urdd, Glan-llyn ger y Bala. Mae’n WYCH!
Daliais i’r bws o’r ysgol am hanner awr wedi wyth y bore yma. Teithion ni i fyny o Aberaeron, drwy Aberystwyth a Machynlleth a stopion ni ym Machynlleth am hanner awr. Roedd hi’n braf cael ychydig o awyr iach cyn cyrraedd pen y daith yn am 11:00.
Mae’r gwersyll yn anhygoel! Mae e ar lan Llyn Tegid ac rydyn ni’n mynd i ganŵio y prynhawn yma. Mae llawer o bethau i wneud yma fel dringo, canŵio, caiacio, adeiladu rafft, cyfeiriannu a mwy. Dw i’n edrych ymlaen at y gweithgareddau i gyd. Mae un gweithgaredd yn gwneud i mi deimlo braidd yn ofnus sef cerdded ar hyd cwrs rhaff a cheisio cadw balans 30 trodfedd yn yr awyr. Mae’r hyfforddwr wedi dweud ei fod yn hollol ddiogel ond fe fydd yn profi fy nyrfau i’r eithaf!
Rhaid i fi fynd! Dw i’n mynd i ysgrifennu mwy heno.
Dyma gysylltiadau os ydych chi eisiau gweld ble dw i’n aros:
http://www.urdd.cymru/cy/ein-gwersylloedd/glan-llyn/cyfleusterau/
http://www.urdd.cymru/cy/ein-gwersylloedd/glan-llyn/pethau-iw-wneud/gweithgareddau/
Gwyliau bwyd ym mhobman!
O Gonwy i Gasnewydd, o’r Fenni i’r Wyddgrug, ac o Sir Benfro i Langollen, mae gwyliau bwyd wedi tyfu fel madarch ledled Cymru dros y blynyddoedd diwethaf. Mae gwyliau’n digwydd drwy gydol y flwyddyn, ac yn enwedig dros yr haf.
Mae rhai gwyliau, fel Wythnos Bysgod Sir Benfro a Gŵyl Bysgod Aberaeron yn canolbwyntio ar bysgod, ond mae’r rhan fwyaf yn wyliau bwyd a diod o bob math.
Y Fenni’n arwain y ffordd
Gŵyl Fwyd y Fenni yw un o’r rhai hynaf yng Nghymru. Mae’n cael ei chynnal ym mis Medi am wythnos gyfan. Erbyn hyn Gŵyl Fwyd y Fenni yw’r mwyaf yng nhalendr bwyd y deyrnas Unedig.
Cafodd ei sefydlu yn 1999 gan ddau ffermwr lleol oedd eisiau dangos bod ffermydd lleol yn cynhyrchu bwydydd gwych. Yn 1999 aeth tua thair mil o bobl i’r Ŵyl, ac roedd llond dwrn o wirfoddolwyr yn rhedeg y stondinau. Erbyn hyn, mae dros 30,000 o bobl yn ymweld â hi ac mae dros 250 o stondinau’n flynyddol.
Beth allwch chi ei ddisgwyl mewn gŵyl fwyd?
Yn ogystal â degau o stondinau, gallwch ddisgwyl:
• gweithdai coginio
• arddangosfeydd coginio
• cyfle i brofi bwyd
• cerddoriaeth fyw
• teithiau cerdded i chwilio am fwyd ‘gwyllt’
• gweithgareddau o bob math i blant
• celf a chrefft
Fel y gwelwch chi o’r rhestr, nid dim ond profi bwyd mae pobl eisiau ei wneud, ond hefyd maen nhw eisiau gwneud rhywbeth ymarferol, e.e. gwneud pice ar y maen neu wneud selsig.
Y peth pwysicaf yw bod gwyliau bwyd yn hwyl. Pan fydd gŵyl fwyd yn dod i'r dref, mae’n amser cael parti – ac mae pawb yn mwynhau parti!
