Mae’r enw ‘Cymru' yn dod o hen air Brythoneg ‘Cymbrogi’ sy'n golygu ‘pobl o’r un fro’ neu 'cyd-wladwyr'. Ar hyn o bryd mae poblogaeth Cymru tua 3.2 miliwn ac mae mwy na 20% yn gallu siarad Cymraeg. Caerdydd yw prifddinas Cymru.
Am ddegawdau roedd Cymru'n adnabyddus oherwydd ei heconomi diwydiannol, lle'r oedd llawer o gyfoeth yn dod o ddeunyddiau crai fel glo a llechi. Bydd gan lawer o bobl y Gogledd a'r De neiniau a theidiau a hen neiniau a hen deidiau oedd yn gweithio ar ffermydd, mewn chwareli llechi, pyllau glo, y diwydiant dur, ar beiriannau stêm ac mewn ffatrïoedd. Efallai y byddai ein hynafiaid hyd yn oed wedi ymfudo i Gymru o'r tu allan ac wedi ymgartrefu yma i weithio yn y diwydiannau sylfaenol ac eilaidd hyn.
Mae'r Gymru newydd yn lle llawer iachach, glanach a gwyrddach; mae llawer o'r diwydiannau peryglus a llygredig wedi diflannu ac mae Cymru'n ei gweddnewid ei hun yn gyrchfan y mae llawer o bobl o bob rhan o'r byd yn dymuno ymweld â hi ar gyfer gwyliau a gweithgareddau hamdden. Ar ddiwedd oes Victoria roedd twristiaeth yn ffynnu yng Nghymru a datblygodd cyrchfannau ar lan y môr yng Nghymru yr atyniadau diweddaraf un, sef pierau glan môr. Mae atyniadau diweddaraf y blynyddoedd diwethaf yn cynnwys cyfleoedd antur fel arforgampau, gwifrau gwibio a sglefrfyrddio i lawr mynyddoedd. Unwaith eto, mae Cymru ar flaen y gad o ran cyrchfannau a gweithgareddau gwyliau cyffrous!
Mae gan Gymru ganrifoedd lawer o hanes ac adeiladau hanesyddol; amrywiaeth o dirweddau a chynefinoedd, bryniau hardd, cymoedd, llwybrau arfordirol a thraethau tywodlyd. Mae gan Gymru amrywiaeth eang o fywyd gwyllt, ar y tir ac yn y moroedd o'n cwmpas. Mae yma fannau aros sy’n addas i bob poced, boed ar y bryniau neu o amgylch y glannau gwych. Mae yma fannau sy'n darparu gweithgareddau hamdden sy'n addas i lawer o wahanol oedrannau, galluoedd a diddordebau.
Mae'r rhifyn hwn yn ystyried yr hyn y gall Cymru ei gynnig i bobl sy'n dymuno ymweld â hi. Mae hefyd yn gofyn cwestiynau am sut mae gwlad yn addasu at newid mewn economeg, diwydiant a chymdeithas.
Croeso i Gymru!
Mae yna lawer o safbwyntiau ar y lleoedd gorau i ymweld â nhw ar eich gwyliau yng Nghymru.
Er enghraifft, yn 2018 cyhoeddodd y Daily Mirror restr o'r deg lle harddaf i ymweld â nhw, yn eu barn nhw.
Mae eu herthygl nhw’n dweud:
“Os ydych chi'n meddwl am wyliau gartref, yna mae digon o resymau pam dylai Cymru fod ar frig y rhestr ar gyfer eich gwyliau bach nesaf. Wedi'r cyfan, mae ganddi dirnodau sy'n cymryd eich anadl a golygfeydd hynod o drawiadol hefyd.
O dirweddau eang ysgubol i bentrefi pert a chestyll hanesyddol, mae digon o lecynnau na fyddwch chi am eu colli p’un a ydych chi am ddiwrnod allan neu rywle i gael gwyliau byr."
Beth am greu eich rhestr eich hun o leoedd yr hoffech chi ymweld â nhw neu’r deg lle gorau ar gyfer gwyliau yn eich barn chi? Pam?
Croeso i Gymru
Os ydych chi’n ddigon ffodus i fyw yng nghefn gwlad neu ar lannau Cymru yn barod, efallai na fyddwch chi’n sylweddoli y byddai llawer o bobl sy'n byw i ffwrdd neu'n byw yma mewn dinasoedd yn llawn cenfigen atoch. Weithiau mae angen i bob un ohonon ni stopio a chofio mor ffodus ydyn ni yn cael byw yma. Beth sy'n gwneud Cymru'n arbennig i chi?
Yn y gweithgaredd hwn mae cyfres o osodiadau ynglŷn â Chymru a allai demtio rhywun i ymweld ac aros. Allwch chi benderfynu sut byddech chi’n rhoi’r gosodiadau isod yn eu trefn o ran eu blaenoriaeth i chi. Beth fyddai'n eich denu chi’n fwyaf arbennig i Gymru?
Does dim atebion cywir: chi biau dewis a hynny ar sail eich syniadau a'ch diddordebau chi. Beth fyddai eich pump uchaf chi? Beth fyddech chi'n ei ychwanegu at y rhestr?
Dyma addasiad o gân Saesneg mae Tad-cu Sofia’n ei chanu’n aml, o’r enw We’ll Keep a Welcome in the Hillsides. Fe gafodd ei hysgrifennu ym 1940 gan Lynn Joshua a dyma’r gân oedd yn agor rhaglen radio o'r enw "Welsh Rarebit" a oedd yn cael ei chynhyrchu gan Mai Jones yng Nghaerdydd ac yn cael ei darlledu bob wythnos ar draws y byd o Neuadd Cory gyferbyn â Gorsaf Heol y Frenhines yn ystod yr Ail Ryfel Byd.
Roedd hwn hefyd yn gyfnod pwysig o newid mawr yng Nghymru.
Dwedodd Tad-cu fod y gân wedi dod yn adnabyddus iawn a bod milwyr Cymru wrth eu bodd yn ei chlywed pan oedden nhw’n gwasanaethu oddi cartref. Mae yna air Cymraeg yn y gân Saesneg a hwnnw’n air sydd heb air i gyfateb iddo mewn unrhyw iaith arall: "hiraeth". Yn ôl Tad-cu mae’r gair “hiraeth” yn crisialu’r teimlad o fod yn Gymro neu Gymraes alltud.
Mae'r gân yn dal yn boblogaidd nawr ac mae llawer o gorau a chantorion enwog o Gymru wedi'i recordio. Mae wedi cael ei defnyddio hefyd mewn hysbysebion teledu modern ar gyfer twristiaeth yng Nghymru.