Mae llawer o chwedlau Cymru'n rhyfedd iawn.
Dyma chwedl Taliesin. Roedd Ceridwen y wrach yn byw gyda'i gŵr, Tegid Foel, ger Y Bala, Gwynedd (mae Llyn Tegid wedi cael ei enwi ar ei ôl) ac roedd ganddyn nhw ddau blentyn. Creirfyw, oedd y ferch harddaf yn y byd, ond eu mab, Morfran, oedd y bachgen hyllaf yn y byd.
Roedd Ceridwen yn poeni tipyn am ei mab, felly aeth ati i wneud diod arbennig iddo er mwyn ei wneud yn ddoeth. Bu'n berwi perlysiau mewn crochan hud am flwyddyn a diwrnod ac ar ddiwedd y cyfnod, roedd Morfran i fod i yfed y tri diferyn olaf. Roedd ei gwas, Gwion Bach, yn ei helpu gyda'r ddiod. Yn anffodus, un diwrnod, pan oedd e'n helpu i droi'r ddiod, llyncodd ddiferyn ohoni a chafodd e'r ddawn i fod yn fardd.
Aeth Ceridwen yn wyllt gacwn a rhedodd ar ôl Gwion Bach. Gan fod y ddiod yn ddiod ryfeddol, trodd Gwion Bach yn ysgyfarnog. Roedd y ddiod ryfeddol wedi rhoi gallu arbennig iddo. Y funud nesaf, dyma Ceridwen, y wrach, yn ei throi ei hun yn filgi cyflym a dyma hi'n rhedeg nerth ei thraed ar ei ôl.
Roedd Ceridwen ar fin dal Gwion pan gyrhaeddodd afon. Felly, dyma Gwion yn troi'n bysgodyn a neidiodd i'r dŵr. Trodd hithau'n ddyfrgi i'w hela yn yr afon ac er i Gwion nofio'n gynt ar hyd yr afon, roedd Ceridwen yn agosáu ato.
Yn sydyn, neidiodd Gwion allan o'r afon a throdd yn aderyn, ond fe drodd Ceridwen ei hun yn hebog, gan hedfan ar ei ôl fel mellten. Llwyddodd Gwion i hedfan oddi wrthi ond roedd yr hebog yn aderyn llawer cynt ac roedd Ceridwen wrth ei gynffon yn fuan iawn.
Yna, cafodd Gwion syniad: beth am droi'n hedyn o ŷd? Felly, trodd yn hedyn a disgynnodd i'r ddaear i ganol pentwr o ŷd. Roedd yn ddiogel, meddyliodd. Fyddai Ceridwen byth yn gallu dod o hyd iddo. Ond na - roedd Ceridwen yn agos unwaith eto. Roedd hi wedi'i throi ei hun yn iâr ac roedd hi'n dechrau bwyta'r ŷd. Bwytodd hi'r ŷd i gyd, gan gynnwys Gwion!
Naw mis yn ddiweddarach, cafodd Ceridwen faban, sef Gwion Bach, yr hedyn ŷd roedd hi wedi'i lyncu. Er ei bod hi'n grac gyda Gwion Bach, doedd hi ddim yn gallu ei ladd. Roedd e'n faban mor hardd. Ond roedd Morfran yn flin, felly lapiodd Ceridwen y baban mewn bag o ledr a'i daflu i'r môr yn Abermaw.
Roedd Morfran yn gobeithio y byddai Gwion Bach yn boddi ond, beth amser yn ddiweddarach, cafodd ei ddarganfod gan Gwyddno Garanhir ger y Borth, rai milltiroedd i'r gogledd o Aberystwyth. Gwyddno Garanhir oedd brenin Cantre'r Gwaelod ac aeth e â Gwion Bach gartre a rhoi'r enw Taliesin arno.
Wrth iddo dyfu, roedd pawb yn gweld bod Taliesin yn fachgen galluog iawn a'i fod yn siarad mewn barddoniaeth. Roedd e'n fachgen rhyfeddol.
Dewch â’ch gobennydd!
Fyddi di'n swingio clustog neu obennydd ar ddydd Sadwrn, Ebrill 4ydd, 2020?
Bydd miloedd o bobl ar draws y byd yn mynd i le cyhoeddus, fel parc neu iard fawr, a byddan nhw'n cael llawer o hwyl yn swingio clustog neu obennydd. Rhyfedd!
Pam bydd miloedd o bobl yn mynd â chlustog neu obennydd i le cyhoeddus?
Dydd Sadwrn 4ydd, 2020 ydy'r International Pillow Fight Day. Bydd miloedd o bobl yn 'ymladd' â chlustogau!
Faint ydy oed y bobl yma?
Gall unrhyw un o unrhyw oed gymryd rhan - plant, pobl ifanc neu oedolion.
Oes angen clustog neu obennydd arbennig?
Nac oes, ond mae'n well defnyddio un meddal.
Sut mae ymladd â chlustog?
Mae'n syml. Rhaid dal clustog a'i swingio'n ysgafn er mwyn trio taro rhywun arall.
Swingio'n ysgafn?
Bydd miloedd o bobl yn swingio clustog yr un pryd, felly rhaid peidio â bod yn rhy wyllt. Hefyd, rhaid peidio â brifo unrhyw un.
Ydych chi'n cael taro unrhyw un?
Nac ydych. Dydych chi ddim yn cael taro unrhyw un sydd heb obennydd.
Oes angen gwisgo dillad arbennig?
Nac oes, ond mae'n well tynnu sbectol i ffwrdd cyn dechrau - rhag ofn.
Beth fydd yn digwydd ar y diwrnod?
Bydd pobl yn dod i ran arbennig o'r ddinas erbyn rhyw amser arbennig. Yna, byddan nhw'n aros am yr arwydd i ddechrau.
Beth ydy'r arwydd?
Cloch neu chwiban uchel.
Beth wedyn?
Bydd pawb yn dechrau taro'i gilydd â chlustog.
Pa mor hir bydd hyn yn para?
Mae hyn yn gallu para am hanner awr neu am ddwy awr - mae'n dibynnu ar y bobl. Y peth gorau ydy aros nes bod pawb wedi blino a stopio'r digwyddiad bryd hynny.
Beth wedyn?
Bydd disgwyl i bawb helpu i glirio'r holl blu ac unrhyw lanast arall, er mwyn gadael y lle mor lân ag yr oedd cyn dechrau.
Faint mae'n gostio?
Dim byd. Mae'n rhad ac am ddim.
Rhyfedd!
Gwastraff!
Mae rhai pobl yn mwynhau yfed paned o goffi unrhyw adeg o’r dydd ac maen nhw wrth eu bodd efo cacen goffi hefyd! Mae pobl eraill yn ychwanegu coffi at refi neu gawl, ond mae rhai pobl yn gwneud pethau eithaf “rhyfedd” efo gweddillion y pot coffi. Maen nhw’n eu harllwys yn yr ardd – i gadw malwod a chathod i ffwrdd – neu’n eu defnyddio gyda’r siampŵ wrth olchi eu gwallt er mwyn creu gwallt sy’n edrych yn iach iawn (ond byddwch y ofalus, mae’n gallu tywyllu’r gwallt!).
Mae rhai pobl yn rhwbio ffa coffi dros eu cyrff er mwyn cael gwared â hen groen hyd yn oed.
Mae gan gwmni o Lundain gynlluniau i ddefnyddio coffi ar gyfer rhywbeth gwahanol iawn! Mae pobl o Brydain Fawr yn yfed 95,000,000 o gwpanau coffi’r dydd sy’n creu 500,000 o dunelli o wastraff coffi!
Mae Arthur Kay, enillydd y teitl Entrepreneur y Flwyddyn 2017, wedi sefydlu cwmni o’r enw Bio-bean, sy’n casglu gwastraff coffi o siopau coffi, gorsafoedd rheilffyrdd, prifysgolion ac ati, er mwyn cynhyrchu tanwydd.
Mae’r cwmni eisoes wedi creu logiau coffi i’w llosgi yn y tŷ i gynhesu cartrefi ac maent yn creu tanwydd bio sy’n gallu rhedeg cerbydau amrywiol gan gynnwys bysys coch Llundain. Byddai hyn yn lleihau llygredd yn y ddinas yn sylweddol.
Dyma rywbeth i chi feddwl amdano y tro nesaf y byddwch chi’n yfed paned hyfryd o goffi!
Am fwy o wybodaeth, ewch i http://www.bio-bean.com/collection/
Oes rhywbeth yn arbennig am Ynys Môn?
Roedd plant ysgol gynradd Rhos-y-bol yn Ynys Môn yn cael gwers bêl-rwyd ar y buarth un diwrnod ym 1977. Edrychodd un o'r merched i fyny wrth iddi hi baratoi i sgorio ac, yn sydyn, gwelodd hi rywbeth yn symud ar draws yr awyr.
Yna, gwelodd y plant i gyd y peth rhyfedd yn hedfan. Aethon nhw i mewn i'r ystafell ddosbarth a gofynnodd yr athrawes Mrs Mair Williams iddyn nhw dynnu llun beth roedden nhw wedi'i weld - heb ddangos i'w gilydd pa fath o lun roedden nhw'n ei wneud. Yna, cymharodd pawb eu lluniau ac roedd pob llun yn edrych yn debyg iawn i'w gilydd. Roedd pawb wedi gweld yr un peth ac roedd pawb wedi tynnu'r un llun!
Beth oedd yn y llun? Llong ofod yn yr awyr. Roedd gwaelod y llong yn fflat ac yn sgleiniog ac roedd y rhan uchaf fel siâp wy.
Mae'n amlwg bod plant ysgol Rhos-y-bol wedi gweld rhywbeth rhyfedd yn yr awyr y diwrnod hwnnw ym 1977. Nid un person yn unig welodd y gwrthrych, ond dosbarth cyfan o blant. Nid yn unig hynny, ond mae rhai pobl wedi gweld golau rhyfedd yn codi allan o'r môr ger Ynys Môn, ac yn disgyn i mewn iddo hefyd. Mae hyn wedi digwydd sawl gwaith oddi ar Ynys Seiriol. Felly, oes 'na rywbeth yn 'byw' yn y môr oddi ar arfordir Ynys Môn?
Tybed?
Ydych chi’n credu mewn estroniaid? Estroniaid o’r gofod neu yn byw yn y môr? Beth am longau gofod? Oes sôn wedi bod am longau gofod yn eich ardal chi?
Diwrnod Recordiau Byd Guinness 2020
18 Tachwedd 2020
18 Tachwedd 2020 yw Diwrnod Recordiau Byd Guinness blynyddol rhif 16. Mae Diwrnod Recordiau Byd Guinness yn ddathliad blynyddol o ddigwyddiadau sy'n torri’r recordiau sydd wedi'u gosod dros y blynyddoedd.
Pwyll all anghofio’r anhygoel Michel Lotito?
Bu Michel Lotito o Grenoble, Ffrainc, sy’n cael ei adnabod fel Monsieur Mangetout (Mr Bwyta Popeth), yn bwyta metel a gwydr gydol ei oes, gan ddechrau yn 1959.
Tynnodd gastroenterolegwyr luniau pelydr X o’i stumog, gan ddisgrifio’i allu i fwyta 900g o fetel y dydd fel un unigryw.
Roedd y pethau a fwytaodd e ar ôl 1966 yn cynnwys:
18 beic,
15 troli archfarchnad,
7 set deledu,
6 chanhwyllyr,
2 wely,
pâr o sgis,
awyren fach Cessna (1978-1980)
a chyfrifiadur.
Daeth Michel yn ymwybodol o'i allu i fwyta eitemau anarferol am y tro cyntaf pan dorrodd gwydr roedd yn yfed ohono, a dechreuodd gnoi'r tameidiau.
Erbyn mis Hydref 1997, roedd e wedi bwyta bron 9 tunnell o fetel.
Dywedodd fod bananas ac wyau wedi'u berwi'n galed yn ei wneud yn sâl am eu bod yn rhy feddal i'w stumog eu treulio!
Bu farw Mr Lotito o achosion naturiol ar 25 Mehefin 2007.
Gair i gall: peidiwch chi byth â gwneud rhywbeth mor rhyfedd! Mae’n beryglus iawn, iawn!
Michel Lotito (15 Mehefin 1950 – 25 Mehefin 2007)
