Mae hyd arfordir tir mawr Cymru oddeutu 1,370 milltir (2,205km) a thrwy adio hyn at arfordir Ynys Môn a Ynys Gybi, mae’r cyfanswm oddeutu 1,680 milltir (2,704km). Mae’r arfordiroedd hyn yn gwneud Cymru yn lle delfrydol i ymgymryd â gweithgareddau awyr agored, yn arbennig syrffio.
Mae Sir Benfro yn fan ddelfrydol i fwynhau gwefr tonnau’r môr gyda syrff Atlantaidd gwych a heriol. Yno mae ysgol syrffio Big Blue a ddechreuwyd gan y syrffiwr enwog Kirsty Jones a’i ffrind. Erbyn heddiw mae cyfleoedd yno i syrffio a phadlfyrddio. Hwn oedd y lleoliad mwyaf godidog i Kirsty Jones ei weld wrth farcudsyrffio ar draws Môr Iweddon o Rosslare i Farloes yn y Gorllewin. Wedi pump awr o fardcudsyrffio a’r gwynt wedi gostegu, tyndra yn cydio, ymddangosodd pâr o ddolffiniaid a nofio wrth ei hochr a’i hannog i gadw i fynd. Yma mae rhai o olygfeydd prydferthaf Cymru wrth agosáu at Ynys Sgomer, ac Ynysweryn (Wormshead).
Mae traethau syrffio Cymru yn boblogaidd iawn gyda thwristiaid. Dyma i chi restr o’r traethau mwyaf poblogaidd i syrffio yng Nghymru:-
Gwychder Gwyddoniaeth
Heddiw dwi wedi cael diwrnod i’r brenin yn Techniquest, syniad yr Athro John Beetlestone a chydweithwyr iddo o Brifysgol Caerdydd. Cafodd Techniquest ei sefydlu ym 1986 gyda 48 o arddangosion. Lai na 10 wythnos ar ôl ei agor, roedd wedi croesawu deng mil o ymwelwyr.
Bwriad yr arddangosion rhyngweithiol a'r rhaglenni gwyddoniaeth oedd apelio at eich llygad a’ch greddf, a denu pobl i fyd cyffrous ac arloesol.
Roedd safle gwreiddiol Techniquest yng nghanol Caerdydd, gyferbyn â Chastell Caerdydd. Cartref dros dro oedd hwn ac ym 1988, symudodd Techniquest i Fae Caerdydd. Ymwelodd y Dywysoges Diana a'r Tywysogion William a Harry â Techniquest ym 1994.
Yn 1995 dyma’r ganolfan yn symud unwaith eto, y tro yma yn symud i'w safle presennol. Mae Techniquest yn cynnig ystod eang o arddangosion a phrofiadau yn eu canolfan yng Nghaerdydd ac mae wedi datblygu'n raddol ac erbyn hyn maen nhw hefyd yn cynnig arddangosion a rhaglenni gwyddoniaeth i amgueddfeydd ac atyniadau i ymwelwyr ledled y byd. Mae dros 200,000 o bobl yn ymweld â Techniquest bob blwyddyn.
Mae'r ganolfan hefyd yn cynnig planetariwm a theatr wyddoniaeth i'w defnyddio gan blant. Mae Techniquest, gyda'u dull arloesol a chyffrous mewn pwnc a allai apelio at nifer fach yn unig o bobl, wedi llwyddo’n ddi-os i ysgogi diddordeb ledled Cymru ers 34 mlynedd. Mae'n bendant yn werth ymweld â nhw.
Celf Gyffrous
Pwy yw Luned Rhys Parri?
Artist sy’n creu gwaith sy’n llawn cymeriad a hiwmor.
Ymhle cafodd ei magu?
Cafodd ei magu yn Llansannan ac erbyn hyn mae’n byw yn Nyffryn Nantlle yng Ngwynedd.
Beth sydd yn cael ei gyfleu yn ei gwaith?
Mae ei gwaith yn mynd â’r gynulleidfa i fyd cymeriadau mewn cymdeithas Gymraeg sydd yn prysur ddiflannu drwy dreigl amser.
Beth sydd yn ei hysbrydoli?
Yr amgylchedd o’i chwmpas yn Nyffryn Nantlle yn ogystal â’i magwraeth yn Llansannan. Mae atgofion am ei theulu yn rhan bwysig o’i gwaith.
Sut fath o dechnegau mae hi’n defnyddio?
Yn aml bydd yn defnyddio llungopi o hen ffotograff neu bapur newydd o fewn ei gwaith ac mae lliwiau dillad y merched yn aml yn llachar. Defnyddia hefyd weiar a phapur wrth greu’r cymeriadau yn y llun.
Ymhle mae ei gwaith yn cael ei arddangos?
Mae’n arddangos ei gwaith trwy Gymru a hefyd yn cynnal gweithdai gyda phlant ysgol. Arddangoswyd ei gwaith am y tro cyntaf yn Haf 2011 yn Ffin y Parc, Llanrwst. Bu iddi arddangos eto yn 2013, 2016 a 2018. Dychwelodd yn 2019 yn ystod arddangosfa dathliadau ‘Merched Cymru’ a gwerthwyd pob darn celf. Bu ei harddangosfa diwethaf yno yn Awst 2020. Bydd Luned yn arddangos ei gwaith diweddaraf yn Oriel Ffin y Parc yn ystod mis Awst 2021. Dewch draw i weld ei gwaith creadigol arbennig!
Dyma ichi gysylltiad i glip o Luned Rhys Parri yn gweithio yn ei stiwdio gelf. https://youtu.be/auQwbBvPjOo
Beicio Mynydd Cymru
Cyfrinach orau Sir Gâr!
14 Hydref 2017
Agorwyd canolfan feicio mynydd gwerth £1miliwn yng Nghoedwig Brechfa, Sir Gaerfyrddin yn 2016 gyda chyfleusterau cysgu i 34 ymwelydd a 12 pod gwersylla cyfleusterau cawod, siop trwsio beic, ystafell gemau, safle gwybodaeth a meysydd parcio gyda safleoedd picnic a barbeciw.
Mae’r safle yn eistedd rhwng Coedwig Byrgwm a’r rhes o goed i’r de o Byrgwm Bach gan ddod â £23 miliwn i economi Cymru.
Mae’r ganolfan yn cynnwys 3 trac amrywiol. Trac Gorlech a grëwyd gan Rowan Sorrell, sef trac sy’n cynnwys 3 llwybr ddringo a disgyn sydd yn ymestyn dros 19km. Gall y beicwyr mwyaf profiadol arbrofi eu sgiliau amrywiol ar Trac Raven sef trac 18.5km o hyd sydd yn fwy heriol ac yn cynnwys nodweddion cynhyrfus. Dyma trac sydd yn cymryd oddeutu awr a hanner i’w gwblhau a chyfleoedd i ddringo 725 o fetrau. I’r gwrthwyneb gwelir trac Derwen sef man cychwyn gwych i deuluoedd a dechreuwyr ac sydd yn rhoi cyflwyniad bendigedig i feicio mynydd gan gynnwys sawl llethr ar i lawr.
Yma yng Nghoedwig Brechfa gwelir sawl cystadleuaeth feicio mynydd yn flynyddol. Mae pob trac yn cyflwyno Coedwig Brechfa ar ei gorau!
