Beth yw hyd y ffyrdd yng Nghymru, Lloegr a'r Alban?
O'r 247,100 o filltiroedd o ffordd ym Mhrydain Fawr yn 2019, roedd 21,000 o filltiroedd (9%) yng Nghymru, 189,100 o filltiroedd (77%) yn Lloegr, a 36,900 o filltiroedd (15%) yn yr Alban.
Faint o gerbydau sydd ym Mhrydain Fawr?
Ar ddiwedd mis Mehefin 2020, roedd 38.4 miliwn o gerbydau trwyddedig ym Mhrydain Fawr, gostyngiad o 0.9 y cant o'i gymharu â diwedd mis Mehefin 2019. Y rheswm am y gostyngiad oedd y cyfnod clo yn y Deyrnas Unedig ym mis Mawrth 2020. Bu’n rhaid i werthwyr cerbydau ac ystafelloedd arddangos gau felly cafodd llai o gerbydau eu gwerthu.
Ceir yw'r rhan fwyaf o gerbydau ar ffyrdd y Deyrnas Unedig. Ym Mhrydain Fawr, roedd 31.6 miliwn o geir (82.4%), 4.1 miliwn o Gerbydau Nwyddau Mawr (LGV) (10.7%), 0.47 miliwn o Gerbyd Nwyddau Trwm (1.2%), 1.3 miliwn o feiciau modur (3.4%), 0.12 miliwn o fysiau a choetsys (0.3%) a 0.74 miliwn o gerbydau eraill (1.9%) wedi’u trwyddedu ar ddiwedd mis Mehefin 2020.
Beth yw'r car mwyaf cyffredin ym Mhrydain Fawr?
Ar ddiwedd 2019, y car trwyddedig mwyaf cyffredin oedd y Ford Fiesta, gydag 1.5 miliwn o geir, ac yna Ford Focus gydag 1.2 miliwn a'r Vauxhall Corsa gydag 1.1 miliwn.
Pa mor aml y mae car yn cael ei ddefnyddio neu ei barcio?
Mae'r car cyffredin yn treulio rhyw 80% o'r amser wedi'i barcio gartref, mae’n cael ei barcio mewn mannau eraill tua 16% o'r amser ac felly dim ond yn cael ei ddefnyddio (yn symud) am y 4% arall o'r amser mewn gwirionedd.
Beth oedd hoff liw car newydd yn 2019?
Llwyd oedd hoff liw car newydd y Deyrnas Unedig yn 2019.
Beth yw oedran car ar gyfartaledd?
8 oed.
Yn ystod oes y car cyffredin, faint o berchnogion fydd ganddo?
Dros oes y car ar gyfartaledd, bydd ganddo bedwar perchennog.
Trydan neu betrol?
Erbyn canol y ganrif hon, mae'n edrych yn debyg y bydd olew'n dod i ben. Mae arbenigwyr yn amcangyfrif fod yna werth oddeutu 50 mlynedd o olew craidd ar ôl yn y ddaear. Felly mae'n rhaid dechrau meddwl am dechnoleg ynni gyrru newydd. Felly, ai ceir trydan yw'r ateb?
Ar hyn o bryd, mae 38 miliwn o geir wedi eu cofrestru ym Mhrydain. Mae oddeutu 164,000 ohonynt yn drydan pur a 474,000 ohonynt yn defnyddio pwer olew a thrydan.
Pam nad oes rhagor? Beth yw’r anfanteision?
Rhaid talu tipyn o arian am geir trydan. Er bod y llywodraeth yn cynnig grant i bawb sy'n prynu car trydan, mae car fel 'Nissan Leaf' yn dal i gostio £29,000. Does dim llawer o geir trydan ail-law ar y farchnad eto chwaith, felly does dim dewis ond prynu ceir newydd, drutach.
Fel arfer, mae'n rhaid gwefru car trydan bob 100 milltir. Felly, byddai taith o ogledd i dde Cymru'n anymarferol iawn oherwydd byddai'n rhaid aros sawl gwaith i wefru. Y drafferth yw bod rhai ceir yn cymryd amser i wefru. O ganlyniad, gellir dadlau y byddai'n haws mynd ar y trên neu'r bws.
Nifer bach o orsafoedd gwefru sydd ar gael yng Nghymru ar hyn o bryd ond mae’r niferoedd yn cynyddu’n ddyddiol. Mae yna 1,174 o orsafoedd yng Nghymru gyda dros 35,000 ym Mhrydain. Heb nifer o orsafoedd gwefru cyfleus, mae'n amhosibl teithio ymhell heb boeni ble ddaw’r cyflenwad gwefru nesaf!
Mae ceir trydan yn ymddangos yn wyrdd ac yn 'lân' o ran yr amgylchedd oherwydd nad ydyn nhw'n allyrru mwg ecsôst. Ond, os yw'r trydan adeiladu a gwefru ceir yn dod o ffynonellau 'budr a brwnt', fel gorsafoedd pŵer sy'n llosgi glo, dydy'r ceir ddim yn wyrdd chwaith.
Beth yw manteision ceir trydan?
Mansel Davies a’i Fab
Ydych chi wedi gweld un o lorïau Mansel Davies? Mae'n rhaid eich bod chi wedi gwneud. Mae gan y cwmni o sir Benfro dros 200 o lorïau. Maen nhw'n teithio i bob rhan o Gymru, Lloegr, Iwerddon, yr Alban ac Ewrop.
Dechrau'r cwmni
Dechreuodd Mansel Davies y cwmni yn 1875, i gario calch, grawn a glo o gwmpas tai a busnesau. Ar y pryd doedd dim lorïau, felly ceffyl a chart oedd yn gwneud y gwaith.
Tyfodd y cwmni a defnyddio lorïau yn lle ceffyl a chart. Erbyn 1962, prynodd Kaye Davies y cwmni oddi wrth ei dad. Stephen Davies, mab Kaye, sy'n rhedeg y cwmni nawr. Yn Llanfyrnach mae prif swyddfa'r cwmni o hyd, ond mae garejys hefyd yng Nghaerfyrddin, yn Nhreletert, ac yn Temple Bar, ger Llanbedr Pont Steffan.
Volvo yw pob lori!
Os gwelwch chi lori Mansel Davies, mae'n rhaid mai lori Volvo yw hi. Dim ond lorïau Volvo sydd gyda nhw. Maen nhw hefyd yn gwerthu tryciau a lorïau Volvo.
Llaeth
Mae oddeutu 120 o danceri Mansel Davies yn casglu 1.5 miliwn litr o laeth bob dydd o dros 450 o ffermydd yng ngorllewin Cymru. Bydd y llaeth yn cael ei symud gan y tanceri, dros Prydain Fawr.
Llwythi eraill
Mae'r llwythi eraill yn cynnwys deunydd crai:
Cadw llygad ar y lorïau!
Mae swyddfa Mansel Davies yn dilyn y lorïau drwy system GPS. Maen nhw'n gwybod yn union:
Felly, rydych chi'n siŵr o weld tancer llaeth Mansel Davies yn rhywle!
Croesi’r bont
Wrth deithio o dde Cymru i Loegr ar yr M4, byddwch chi'n croesi aber afon Hafren ar un o bontydd Hafren. Ond ers rhyw hanner can mlynedd yn unig mae'r pontydd yn bod mewn gwasanaeth. Cyn 1966 roedd yn rhaid i geir fynd ar fferi o Beachley i Aust.
Pont Hafren
Roedd Thomas Telford (a gynlluniodd bont Menai) wedi awgrymu cael pont yn 1824, ond roedd llawer o broblemau peirianyddol. Bu'n rhaid aros tan 1966 cyn i'r bont gael ei chodi. Pont grog yw hi, ac ar y pryd, roedd yn un o brosiectau peirianyddol mwyaf blaenllaw'r byd ac enillodd hi lawer o wobrau. Dyma wybodaeth gryno amdani:
Ail groesfan Hafren
Erbyn diwedd yr 1980au, roedd llawer mwy o draffig ar yr M4 a doedd y bont wreiddiol ddim yn ymdopi'n dda. Felly, penderfynwyd codi ail bont a dechreuwyd ar y gwaith yn 1992. Mae rheiliau arbennig ar y bont sy'n torri ar gryfder y gwynt, felly does dim rhaid i gerbydau deithio'n araf yn aml os bydd gwyntoedd mawr. Mae Pont Hafren (y bont gyntaf) yn gorfod cael ei chau oherwydd gwyntoedd mawr.
Dyma fanylion ail groesfan Hafren:
Y bws ysgol
Os ydych chi'n teithio i'r ysgol ar fws, tybed beth yw oed y gyrrwr? Yn hŷn na Joseff Edwards, siwr o fod. Dim ond 18 oed yw Joseff ac mae'n ddisgybl yn chweched dosbarth Ysgol Dyffryn Taf yn Hendy-gwyn ar Daf.
Pasiodd Joseff ei brawf gyrru bws yn 18 mlwydd oed, felly mae'n cael gyrru bws 54 sedd. Bydd yn codi cyn cŵn Caer bob bore i gasglu 38 o ddisgyblion a mynd â nhw i'r ysgol. Mae Joseff yn gwisgo ei wisg ysgol gyda siaced gyrrwr bws drosti.
"Mae pobl yn synnu gweld rhywun mor ifanc â fi'n gyrru bws," medd Joseff.
Ar ôl cyrraedd yr ysgol, bydd Joseff yn gadael y bws yn y maes parcio ac yn mynd i'w wersi. Ar ddiwedd y dydd, mae'n gyrru pawb adref eto.
"Dwi'n mwynhau gyrru pawb i'r ysgol ac yn ôl adref. Does dim trafferth ar y bws byth achos mae pawb yn fy adnabod ond weithiau bydd fy ffrindiau'n tynnu fy nghoes. Maen nhw eisiau i mi fynd â nhw ar drip neu ar wyliau, ond bydd yn rhaid iddyn nhw aros."
Mae gan rieni Joseff gwmni bysys sy'n gyrru disgyblion i Ysgol Dyffryn Taf. Mae 21 bws ganddyn nhw i gyd. Ar ôl cael ychydig o wersi gan ei dad, pasiodd Joseff ei drwydded PCV -Passenger Carrying Vehicle. Cynigiodd ei dad swydd i Joseff ac mae'n rhoi £20 y dydd iddo am ei waith.
"Mae Joseff wrth ei fodd," medd ei dad, "mae'n rhaid bod gyrru yn ei waed."
Yn y pen draw, mae rhieni Joseff yn gobeithio y bydd yn dod i weithio yn y busnes, ar ôl iddo fod yn y coleg.
Gwastraff gwyrdd
07 Tachwedd 2020
Sir Ddinbych yn Camu Ymlaen!
Mae lori sbwriel drydan newydd yn cael ei threialu yn Sir Ddinbych i geisio lleihau allyriadau carbon. Yn ddiweddar, mae lori sbwriel drydan wedi gwagio biniau trigolion Sir Ddinbych am y tro cyntaf. Mae tîm gwastraff ac ailgylchu Cyngor Sir Ddinbych wedi bod yn treialu'r lori casglu gwastraff newydd yn y Rhyl, Prestatyn a Rhuthun.
Mae treialu lori e-Collect Dennis Eagle yn rhan o waith yr awdurdod i leihau allyriadau carbon a diogelu'r amgylchedd ar gyfer cenedlaethau'r dyfodol.
Dywedodd y prif aelod dros wastraff, trafnidiaeth a'r amgylchedd yng Nghyngor Sir Ddinbych: "Mae'r cyngor o ddifrif am fynd i'r afael â'r argyfwng hinsawdd a'r argyfwng newid ecolegol.
"Fel rhan o'r gwaith hwnnw rydym yn gofyn i breswylwyr ailgylchu cymaint o'u gwastraff â phosibl a rhaid i ninnau hefyd leihau'r allyriadau carbon sy’n cael eu cynhyrchu wrth gasglu’n gwastraff a chyd-fynd â’r datblygiadau newydd mewn technoleg."
Dros yr ychydig fisoedd nesaf bydd y Cyngor yn gwerthuso ac yn defnyddio tystiolaeth o'r treial i benderfynu faint o gerbydau trydan y gallai eu cynnwys yn ei fflyd yn ystod y ddwy flynedd nesaf, gan fod ei fflyd bresennol o lorïau yn barod i gael ei disodli.
Bydd angen i'r awdurdod asesu pa rannau o'r sir a all gael eu gwasanaethu gan y model hwn gan fod amryw o gerbydau'n cael eu defnyddio ar hyn o bryd mewn pentrefi a threfi i gasglu sbwriel dros arwynebedd o fwy nag 844 km2
Ar ben hynny, dywedodd y prif aelod dros wastraff, trafnidiaeth a'r amgylchedd yng Nghyngor Sir Ddinbych: "Mae'r treial wedi dangos bod digon o gapasiti ar ôl yn y batri ar ddiwedd sifftiau a heb fwg o’r egsost a gostyngiad mewn sŵn, mae'r cerbyd yn fwy diogel ac yn fwy cyffyrddus i’r staff ei weithredu."
Ar hyn o bryd, mae datblygiadau ar ganolfan gwastraff newydd y cyngor yn Ninbych i fod i gael eu cwblhau yn 2022. Mae'r datblygiad wedi'i gynllunio'n unswydd i gymryd cerbydau trydan, yn ogystal â cherbydau eraill ag allyriadau isel yn y dyfodol.
